ჩოხატაურში ძლიერმა ქარმა და უხვმა ნალექმა პრობლემები გამოიწვია.
დაზიანებულია საცხოვრებელი სახლების, ადმინისტრაციული შენობის, ნოდარ დუმბაძისა და ნიკო მარის სახლ-მუზეუმების სახურავები.
მუნიციპალიტეტის სოფლებში შეზღუდული იყო ელექტროენერგიის მიწოდება. „ენერგო-პრო ჯორჯიას“ წარმომადგენლები უწყვეტ რეჟიმში მუშაობენ. ელექტროენერგია ნაწილობრივ აღდგენილია და ეტაპობრივად ყველა სოფელში აღდგება.
მობილიზებულნი არიან საგანგებო სიტუაციების მართვის სამსახურისა და „სერვის ჯგუფის“ თანამშრომლები. მიმდინარეობს ზარალის აღწერა. სტიქიის შემსწავლელი კომისია ადგენს ზარალის ზუსტ ოდენობას.
ჩოხატაურის მუნიციპალიტეტის მერი დავით შარაშიძე, ადგილობრივი თვითმმართველობის წარმომადგენლებთან ერთად, დაზარალებულ ოჯახებში იმყოფებოდა და ვითარებას ადგილზე გაეცნო.
მერის განცხადებით, მუნიციპალიტეტის მერია, შესაძლებლობების ფარგლებში, ყველა ოჯახს აღმოუჩენს დახმარებას; თუ საჭირო გახდება, უზრუნველყოფს ოჯახების ქირით გაყვანას.
