„ჩოხატაურისთვის ძალიან მნიშვნელოვანია ამერიკის საერთაშორისო განვითარების სააგენტოს მიერ, პარტნიორ მუნიციპალიტეტად არჩევა. ქვეყანაში მიმდინარე დეცენტრალიზაციის პროცესის ფონზე, განხორციელდება საჯარო მმართველობისა და ანგარიშვალდებულების გაუმჯობესება, მოქალაქეთა საჭიროებებზე მორგებული, ადგილობრივ სერვისებზე წვდომის ხელშეწყობა, სამოქალაქო ჩართულობის გაძლიერება. იმედს გამოვთქვამთ, რომ ჩვენი თანამშრომლობა იქნება ეფექტური და პროდუქტიული“ – განცხადა ჩოხატაურის საკრებულოს თავმჯდომარემ ირაკლი კუჭავამ.პირველ თებერვალს ჩავედით ჩოხატაურის მუნიციპალიტეტში და შევხვდით საკრებულოს თავმჯდომარეს, მერს, მერის მოადგილეებს, მერიის და საკრებულოს თანამშრომლებს.
ჩვენმა გუნდმა წარადგინა USAID-ის ადგილობრივი თვითმმართველობის პროგრამის ძირითადი მიმართულებები, განვიხილეთ ჩოხატაურის საჭიროებები და გამოწვევები და “თანა-შექმნის“ პრინციპით მოვახდინეთ იდენტიფიცირება იმ პრიორიტეტული სფეროების, სადაც პროგრამას შეუძლია მხარდაჭერა მუნიციპალური მმართველობის სისტემების გაუმჯობესების და მოქალაქეთა საჭიროებებზე მორგებული საჯარო სერვისების მიწოდების უზრუნველსაყოფად. სამუშაო შეხვედრის ფარგლებში, ასევე განვიხილეთ მოქალაქეთა ჩართულობის არსებული და ახალი ინსტრუმენტების გაძლიერების და დანერგვის შესაძლებლობები.
